ՄԱՅՐԻԿԻ ՕԳՆԱԿԱՆԸ


1 share

Եթե մի քանի տարի հետո ուզում եք Ձեր փոքրիկին տեսնել կոկիկ ու մաքրասեր, ապա սկսել հարկավոր է դեռ վաղ մանկությունից: Նախադպրոցական տարիքի երեխաները լիովին կարող են օգնել ծնողներին տնային գործերում և միևնույն ժամանակ, նրանք այդ ամենին վերաբերվում են ինչպես խաղի: Երեխան սիրով օգնում է, երբ հասկանում է, որ դա շատ կարևոր է իր մայրիկի համար, երբ ծնողները գովում են նրան ու շնորհակալություն հայտնում: Երեխան գտնում է իր տեղը տանը, իսկ Դուք գտնում եք աշխարհի ամենալավ օգնականին:

Մայրիկի օգնականը

Նախևառաջ, երեխային որևէ բան հանձնարարելուց առաջ համոզվեք, որ նա կկարողանա դա անել կամ դա նրա մոտ բացասական արձագանք չի առաջացնի: Հակառակ դեպքում կա վտանգ, որ նա այսուհետ ընդմիշտ կկորցնի հետաքրքրությունը տնային գործերում մեծերին օգնելու հանդեպ: Իսկ եթե երեխան ինքն է ցանկություն հայտնում օգնել, ապա ոչ մի դեպքում մի հրաժարվեք նրա օգնությունից: Դա նույնպես կհանգեցնի վերը նշված արդյունքին: Անգամ եթե այդ պահին մտածում եք, որ նա միայն կխանգարի, պետք չէ նրան հեռացնել սենյակից: Նրան մի փոքրիկ գործ տվեք, և նա մի անկյունում խելոք կաշխատի և իրեն շատ կարևոր ու անհրաժեշտ կզգա: Եթե երեխան իր ուժերից վեր գործ է ցանկանում անել, շեղեք նրա ուշադրությունը ավելի պարզ և նրա համար մատչելի գործերի վրա: Օրինակ, եթե նա ցանկանում է պատին մեխ մեխել, ապա խնդրեք նրան ընտրել անհրաժեշտ չափի մի քանի մեխ և Ձեզ տալ: Եթե նա ցանկանում է ճաշ պատրաստել Ձեզ հետ, ապա խնդրեք, որ դասավորի մթերքները սեղանին և այլն:

Հազիվ քայլել սովորելով՝ երեխան սկսում է կրկնօրինակել Ձեր շարժումները: Դուք կարող եք օգտվել դրանից և սովորեցնել նրան հավաքել իրերն իր հետևից: Մեկ ու կես տարեկան երեխան արդեն հանգիստ կարող է վերցնել իրը և դնել անհրաժեշտ տեղում: Այդպես նա ոչ միայն կսովորի կոկիկ լինել, այլև կզարգանա նրա հիշողությունը: Երբ երեխան ճիշտ կատարի Ձեր խնդրանքը, անպայման գովեք նրան, իսկ եթե ինչ-որ բան չստացվի, մի բարկացեք նրա վրա: Երկու տարեկանից սկսած երեխան կարող է կոկիկ դնել իր հագուստը քնելուց առաջ: Իսկ երեք տարեկանից սկսած նրան ավելի բարդ առաջադրանքներ կարող եք տալ՝ հավաքել սեղանի վրա թափված հացի փշուրները, ջրել ծաղիկները կամ մաքրել փոշին:

Մայրիկի օգնականը

Իհարկե, առաջին փորձերը կարող են այնքան էլ հաջող չլինել, բայց ոչինչ: Շուտով նա ամեն ինչ կսովորի: Հնարավոր է նաև, որ երեխան կամակորություն անի և չցանկանա օգնել Ձեզ: Այդպիսի դեպքերում կարող եք փոքրիկ մրցույթ կազմակերպել Ձեր երկուսի միջև (կարող եք ներգրավել նաև տան մյուս անդամներին): Ո՞վ ավելի արագ կկատարի իր գործերը:

Իսկ տնային գործերն ավարտելուց հետո կարող եք միասին մի ուրախ բան մտածել, մուլտֆիլմ դիտել կամ գնալ զբոսանքի: Ամեն ինչ հրաշալի կստացվի Ձեր և Ձեր փոքրիկի մոտ, միայն թե մի մոռացեք Ձեր ամեն մի խոսքն ու խնդրանքը լցնել ժպիտով ու Ձեր անսահման սիրով…


Like it? Share with your friends!

1 share

Մեկնաբանել

 

Շնորհակալություն

Հավանեք մեր էջը Facebook-ում։