ՄԻԿԻ ՄԱՈՒՍ


Միկի Մաուսը

Ինձ թվում է` մուլտֆիլմ հնարողները ամենախելացի մարդիկ են: Որքան էլ մտածում եմ, միևնույն է, մուլտֆիլմերից ավելի լավ բան չեմ կարողանում գտնել: Ինչ լավ է, որ մենք էլ սովորեցինք, թե ինչպես են մուլտֆիլմ նկարում: Եթե ուշադիր ու աշխատասեր լինենք, անպայման մի օր էլ մենք կկարողանանք մուլտֆիլմ ստեղծել:

Իսկ մինչև կհասցնես նկարել քո առաջին մուլտհերոսին, ուզում եմ քեզ ծանոթացնել աշխարհի ամենալավ ու աշխատասեր մուլտիպլիկատորներից մեկի` Ուոլտ Դիսնեյի հետ: Նա նկարահանել է համարյա 600 մուլտֆիլմ և բոլորն էլ մեկը մեկից հրաշալի են: Նա իր բոլոր հերոսներին էլ շատ էր սիրում, բայց նրա ամենասիրելի ընկերը մեծ ականջներով ուրախ մկնիկն էր: Ճիշտ գուշակեցիր` Միկի Մաուսը:

Միկի Մաուսը

Մի օր գնացքի մեջ Ուոլտ Դիսնեյը մտածեց, որ, ճիշտ է, ինքը շատ է վախենում մկներից, բայց, միևնույն է շատ է սիրում նրանց, չէ՞ որ նրանք այնքան զվարճալի են: Եվ Ուոլտ Դիսնեյը վերցրեց թուղթն ու մատիտն և նկարեց ամենաառաջին Միկի մկնիկին: Առաջին Միկին ահա այսպիսի տեսք ուներ, իսկ նրա անունն էլ շատ լուրջ էր հնչում` Մորտիմեր:

Միկի Մաուսը

Բայց Մորտիմեր անունը շատ շուտով դարձավ Միկի Մաուս, իսկ մկնիկի ձեռքերին էլ մեծ սպիտակ ձեռնոցներ հայտնվեցին: Առաջին անգամ Միկին եթերում հայտնվեց հենց 1928 թվականի նոյեմբերի 18-ին:

Դիսնեյն այնքան շատ էր սիրում Միկիին, որ ինքն էլ հնչյունավորում էր նրան. Այսինքն` Միկին խոսում էր նրա ձայնով: Միկին նաև շատ լավ ընկերներ ունի` ուրախ ու բարի Գուֆֆին, Պլուտո անունով հետաքրքրասեր շնիկը, համառ Դոնալդ բադիկն ու նրա ընկերուհի Դեյզին և իհարկե Միկիի թիթիզ ընկերուհին` Մինի մկնիկը: Ի Դեպ, շատ տարիներ առաջ Մինիին էլ Միրանդա էին կոչում:

Միկի Մաուսը

Միկի Մաուսն իր ընկերների հետ նկարահանվել է 87 մուլտֆիլմում, դարձել հրշեջ, վաճառական, անգամ արքայազն: Նա աշխարհի միակ մուկն է, որ արժանացել է Օսկար մրցանակի: Միկին արդեն 84 տարեկան է, բայց երբեք չի մեծանում, նույն պստիկ, զվարճալի մկնիկն է:

Միկի Մաուսը

Միկի Մաուսի մյուս գործընկերների մասին ես քեզ անպայման կպատմեմ, իսկ դու հենց հիմա փորձիր նկարել Միկիին, նույնիսկ կարող ես նրա մասին մի ուրախ պատմություն գրել ու ինձ ուղարկել: Ես շատ եմ ուզում կարդալ դա, իսկ մի օր համոզված եմ կտեսնեմ հենց քո առաջին մուլտֆիլմը, չէ՞ որ այն միասին ենք ստեղծելու…


Like it? Share with your friends!

Մեկնաբանել

 

Շնորհակալություն

Հավանեք մեր էջը Facebook-ում։