facebook

ԻՍԿ ԴՈՒՔ ՎԻՆԻ ԹՈՒԽԻՆ ԻՆՉ-ՈՐ ՄԵԿԻ ՉԵ՞Ք ՆՄԱՆԵՑՆՈՒՄ


Երբ Ֆյոդոր Խիտրուկն ու նրա թիմը սկսեցին աշխատել Վինի Թուխի մասին պատմող ռուսական մուլտի վրա, նրանք դիմեցին բավական արկածախնդիր քայլի: «Մեր բյուջեն շատ սուղ էր, մենք հեղինակային իրավունքները չգնեցինք, չվճարեցինք գրքի թարգմանչին: Եվ հետո էլ մեր մուլտֆիլմը չէիք կարող ցույց տալ ողջ աշխարհին: Անգամ վախենում էինք, որ կարող էին արգելել մեր աշխատանքի ցուցադրումը: Բայց դա տեղի չունեցավ, մեր մուլտը երևի շատ էր սիրվել»,- պատմում է մուլտֆիլմի մուլտիպլիկատոր Վլադիմիր Զույկովը:

Հենց այս մուլտիպլիկատորն էլ փորձեց նոր շունչ հաղորդել գրքի հերոսներին: Վինի Թուխին նա փորձեց նկարել իր մանկության խաղալիք արջուկի նմանությամբ: Բայց արջուկը ստացվեց շատ կլոր, փրչոտ ու անհավասար մեծության աչքերով:  Ռեժիսորին այդ տարբերակը դուր չեկավ, և նրանք միասին սկսեցին նկարել նոր տարբերակներ:

Ֆյոդոր Խիտրուկը
Ֆյոդոր Խիտրուկը

Եվ բոլորովին պատահաբար գտնվեց լուծումը: Սկզբում որոշվել էր նկարել կերպարը, ապա գտնել այն դերասանին, ով կհնչյունավորեր նրան: Բայց Վինի Թուխի ճիշտ պատկերն այդպես էլ չէր գտնվում: Եվ հանկարծ Ֆյոդոր Խիտրուկը հիշեց, որ իր արևմտյան գործընկերները մեկ անգամ չէ, որ գտել են հնչյունավորող դերասանին և նոր միայն նկարել մուլտհերոսին՝ նմանեցնելով հենց դերասանին:

Երբ ստուդիա եկավ դերասան Եվգենի Լեոնովը և կանգնեց բարձրախոսի մոտ, թեքեց գլուխն ու խորամանկորեն ժպտաց, բոլորը միանգամից բացականչեցին. «Ահա և Վինի Թուխը»: Փաստորեն Եվգենի Լեոնովը Վինի Թուխին ոչ միայն իր ձայնը նվիրեց, այլև օգնեց գտնել իր կերպարը:

Որպեսզի Վինի Թուխի ձայնն ավելի արտահայտիչ ստացվեր, այն մի փոքր արագացնում էին: Լեոնովը շատ էր անհանգստանում. արդյոք ստացվո՞ւմ է իր մոտ Վինիին լավ հնչյունավորել, թե ոչ: Ասում են, ժամանակ առ ժամանակ նա նույն Վինիի ձայնով փնթփնթում էր. «Վերջ, ես գնացի: Այսպես լավ չէ»: Եվ ստեղծագործական ողջ թիմը սկսում էր նրան համոզել, որ ամեն ինչ հրաշալի է: Շատերը Լեոնովին արդեն կոչում էին «Մեր բարի Վինի Թուխը»:

Ի դեպ, նկատե՞լ եք՝ Վինի Թուխը մուլտֆիլմում այնքան էլ ճիշտ չի քայլում, աջ թաթը շարժվում է աջ ոտքի հետ: Դա էլ արդեն անիմատորների սխալն է: Պատահաբար է ստացվել նաև Վինիի ծուռ ականջը (դե նա այդ ականջի վրա էր քնում):

Վինիի ընկերը՝ Դնչիկը, նույնպես հեշտ ճանապարհ չի անցել: Սկզբում մուլտիպլիկատորները նրան նկարել էին թմբլիկ, կուշտ կերած խոզուկի պես: Սակայն հետո սցենարիստի պնդմամբ ստացվեց ահա այս Դնչիկը՝ նուրբ, փխրուն ու փոքրիկ:

Եվ թեկուզ շատ երկրներում կարծում էին, որ Վինի Թուխին Ռուսաստանում երևի դարձրել են իրենց գաղափարերի կրողը ու քաղաքականացրել, մենք հո լավ գիտենք, թե որքան բարի ու անմեղ հերոս է Վինին: Իրականում նա գրեթե ազգային հերոս դարձավ Ռուսաստանում: Դե իսկ Եվգենի Լեոնովի անունն այդպես էլ մնաց՝ Վինի Թուխ: Անգամ հենց ինքը իրեն այդպես էր անվանում ու բոլորովին չէր բարկանում, երբ իր ետևից բոլորը կանչում էին այդպես՝ Վինի Թու՜խը

Անահիտ Ալեքսանյան

Մեկնաբանություններ

ԻՍԿ ԴՈՒՔ ՎԻՆԻ ԹՈՒԽԻՆ ԻՆՉ-ՈՐ ՄԵԿԻ ՉԵ՞Ք ՆՄԱՆԵՑՆՈՒՄ

log in

reset password

Back to
log in