ՀԱՆՐԱՀԱՅՏ ANGRY BIRDS ԽԱՂԸ

Հանրահայտ Angry Birds խաղը ստեղծվել է ֆիննական Rovio ընկերության կողմից, որը համակարգչային խաղերի արտադրող ընկերություն է: Սա շատ պարզ խաղ է. մի խումբ բարկացած թռչուններ պայքարում են շատ տհաճ կանաչ խոզուկների դեմ, որոնք գողացել են թռչունների ձվիկները: Եվ թռչունները պարսատիկի օգնությամբ փորձում են վերացնել այդ կենդանիներին:

Իսկ ինչպե՞ս ստեղծվեց Angry birds-ը: Այսպիսի խաղ ստեղծելու գաղափարը ծագեց մի խումբ տղաների մոտ: Նրանցից մեկը շատ լավ էր նկարում թռչուններ, իսկ թռչուններին բոլորն են սիրում: Նա նկարեց, մյուսը գրեց, խաղի անունն էլ որոշեցին և մտածեցին, թե ամեն ինչ պատրաստ է: Բայց մեկ անգամ ևս հանդիպելով՝ նրանք որոշեցին ստեղծել ոչ թե սովորական, այլ բարկացած թռչուններ, որոնց թշնամիներն անկախ իրենցից դարձան խոզուկները: Դա էլ այն պատճառով, որ խոզուկներին շատ քչերն են սիրում: Եվ այս պահից սկսվեց թռչունների ու խոզուկների խաղային պատերազմը: Խաղի անունն էլ որոշվեց կնքել «Angry birds», այսինքն՝ «Բարկացած թռչուններ»:

Տղաների կարծիքով Angry birds-ը պետք է դառնար պարզապես շարքային մի խաղ, բայց… Փիթերը՝ խաղի ստեղծողներից մեկը, իր մայրիկին առաջարկեց խաղալ այս խաղը՝ մտածելով, որ մայրիկը կվերցնի, մի երկու անգամ կխաղա և մի կողմ կդնի հեռախոսը: Հենց այսպես մտածելով էլ՝ նա դուրս եկավ զբոսնելու: Բայց վերադառնալով մոտ մեկ ժամից՝ տեսավ, որ մայրիկը դեռ խաղում է: Եվ հենց այստեղ նա հասկացավ, որ Angry birds-ը մեծ հեղինակություն կվայելի ու կդառնա շատերի սիրելի խաղը:

Այս ամենը տեղի է ունեցել դեռևս 2009 թվականին: Բայց խաղը շատ կարճ ժամանակում տարածում է գտել ամբողջ աշխարհում և  դարձել բոլոր խաղերի առաջատարը:

Մինչև օրս ողջ աշխարհում ներբեռնվել է Angry Birds -ի ավելի քան 400 միլիոն օրինակ։ Իսկ օրական 30 միլիոն մարդ խաղում է Angry Birds: Խաղացողները միասին վերցրած ծախսում են օրական 300 միլիոն րոպե խաղի վրա։ Ի դեպ, ամենաակտիվ խաղացողները Չինաստանից են։

Rovio ընկերությունը պարբերաբար թողարկում է նոր հավաքածուներ խաղի հերոսներով՝ պայուսակներ, փափուկ խաղալիքներ, մանկական հագուստ և այլն։ Իսկ շատ շուտով խաղը նաև կունենա մուլտֆիլմային և ֆիլմային տարբերակ:

Angry Birds-ը կարող ես խաղալ այստեղ:

Ավելի շատ խաղեր կարող ես խաղալ այստեղ:

Անի Ավագյան