Աշխարհի ամենատարածված սննդամթերքներից մեկը ամենասովորական ձուն է: Այն օգտագործվում է բոլոր հնարավոր ուտեստների ու թխվածքների մեջ, դառնում հրաշալի ձվածեղ և վերջապես Սուրբ Զատիկի սեղանի ամենակարևոր բաղադրիչն է: Այն չափազանց սննդարար է, պարունակում է բազմաթիվ օգտակար նյութեր՝ ցինկ, երկաթ, կալիում, և վիտամիններ՝ A, B և E: Այս ամենից զատ ձուն պարզապես հրաշալի նախաճաշիկ կարող է դառնալ բոլորիս համար:
Իսկ եթե ուզում ես, որ նախաճաշդ նաև ուրախ լինի, ապա դա էլ շատ հեշտ է: Պատրաստում ենք ձվով նախաճաշ զվարճալի մկնիկների տեսքով: Եվ այսպես, ի՞նչ է հարկավոր դրա համար.
- 3 խաշած ձու
- Հազարի տերևներ
- Բողկ
- Մաղադանոսի կամ համեմի պոչիկներ
- Սև պղպեղի հատիկներ
Ձվերի ներքևի հատվածից մի փոքր կտրիր, որպեսզի ամուր կանգնեն ափսեի մեջ: Դրանք մեր մկնիկներն են: Ապա բողկը բարակ շերտիկների բաժանիր. դրանք պետք է ծառայեն, որպես մկների ականջներ: Կանաչու պոչերից բեղիկներ պատրաստիր մկների համար, սև պղպեղի հատիկներց էլ՝ աչքեր: Բողկի կեղևից մի փոքրիկ հատված էլ տեղադրիր մկնիկների քթերի տեղում: Իսկ բողկի պորչիկներն էլ կտրելով՝ դարձրու մկների պոչիկներ:
Ահա և վերջ: Վստահ եմ՝ ձուն այս տեսքով շատ ավելի համեղ կլինի: Իսկ հիմա շտապիր ուտել և վազել դպրոց: Հիմա դու բավականաչափ էներգիա ունես, որպեսզի մեծ ուշադրությամբ հետևես քո բոլոր դասերին ու դասամիջոցներին էլ մի լավ վազվզես..