ԻՆՉՊԵՍ ԼՈՒՅՍ ԱՇԽԱՐՀ ԵԿԱՆ ԹՈՄՆ ՈՒ ՋԵՐՐԻՆ


Թոմն ու Ջերրին

70 տարի առաջ մի սովորական օր բոլորովին անհայտ մի սցենարիստ՝ Ռիչ Խոգանը, առաջարկեց Մետրո Գոլդուին Մայեր ընկերության անիմացիայի բաժնի տնօրեն Ռուդոլֆ Այզինգին նոր մուլտֆիլմ ստեղծել: Մուլտֆիլմը պետք է լիներ անդադար կռվող մկան ու կատվի մասին: Ռուդոլֆ Այզինգը կասկածանքով վերաբերվեց այս առաջարկին, բայց այնուամենայնիվ որոշեց ռիսկի դիմել: 1940 թվականի փետրվարի 20-ին էկրաններ բարձրացավ մուլտֆիլմի առաջին մասը: Երբ Ռուդոլֆ Այզինգը տեսավ, թե ինչպես է հանդիսատեսը փորը բռնած ծիծաղում, հասկացավ, որ չի սխալվել: Հիմա նա պատրաստ էր նկարահանել այս մուլտֆիլմի հարյուրավոր ու հազարավոր նոր սերիաներ…

Ուիլյամ Խաննան և Ջոզեֆ Բարբերան

Մուլտֆիլմի կերպարները մշակեցին երիտասարդ ռեժիսորներ Ուիլյամ Խաննան և Ջոզեֆ Բարբերան: Մուլտֆիլմի առաջին սերիայի վրա աշխատանքները ձգվեցին գրեթե երկու տարի: Առաջին մասում կատվի ու մկան անունները Ջասպեր և Ջինկս էին ու մեր օրերի Թոմին ու Ջերրիին այնքան էլ չէին հիշեցնում: Հազիվ էր հասցրել մուլտֆիլմը էկրաններ բարձրանալ, երբ այն արդեն Օսկարի առաջադրեցին: Երկրորդ մուլտֆիլմից հերոսներին արդեն սկսեցի կոչել Թոմ ու Ջերրի, և աստիճանաբար նրանք ձեռք բերեցին իրենց այժմյան տեսքը:

Իրվինս Սփենսը՝ Թոմի նկարիչը, հիշում էր, թե ինչպես էր ինքը Թոմին իր սեփական դիմագծերն ու միմիկան նկարում: Հաճախ նույնիսկ կանգնում էր հայելու առաջ ու արտանկարում իր շարժումները: «Ես պարզապես պաշտում եմ Թոմին նկարել: Անգամ մեր բնավորություններն են իրար նման», – ասում էր Սփենսը:

Թոմն ու Ջերրին

Հանդիսատեսը այնպես էր կլանվում Թոմի ու Ջերրիի վազվզոցով, որ նույնիսկ չէր նկատում, թե որտեղ են նրանք վազվզվում: Միայն մի մուլտհերոս նրանց աչքից չվրիպեց: Դա Թոմի տանտիրուհին էր, տիկին Հողաթափիկը: Այդպես նրան կոչեցին այն պատճառով, որ կադրում միշտ երևում էին միայն նրա ոտքերը և հողաթափերը: Մուլտֆիլմի երկրպագուները հեղեղեցին մուլտստուդիան խնդրանքներով, որ ցուցադրեն տանտիրուհու դեմքը: Միայն մեկ սերիայում տանտիրուհու դեմքը երևաց մի ակնթարթով և բոլորը հասկացան, որ տիկին Հողաթափիկը շատ նման էր սևամորթ դերասանուհի Հեթթի Մաքդանիելին:  Տիկին Հողաթափիկից բացի մուլտֆիլմում հանդես են գալիս նաև Սփայք անունով շունը, Թոմի ընկերուհին, Ջերրիի փոքրիկ զարմիկը և այլն:

Թոմն ու Ջերրին

Թոմն ու Ջերրին երբեք չեն խոսում, երբեմն տարբեր տեսակի ձայներ են արձակում, որոնք բոլորը հնչյունավորել է Ուիլյամ Խաննան: Բայց փոխարենը Թոմն ու Ջերրին կարդալ գիտեն: Ի դեպ, Ջերրին ամենից հաճախ կարդում է «Good Mousekeeping» («Մկների ճիշտ խնամք») գիրքը, իսկ Թոմը՝ թերթեր: Ջերրին նույնիսկ Մանկավարժական բարձրագույն կրթության դիպլոմ ունի: Թոմն էլ հրաշալի նվագում է ոչ միայն դաշնամուրի, ջութակի վրա, այլև իր սիրելիի համար սերենադներ է երգում:

Ահա այսպիսի բաներ, այսպես լույս աշխարհ եկան Թոմն ու Ջերրին ու սկսեցին իրենց ճամփորդությունը ողջ երկրագնդով: Թե ինչպիսի արկածների մեջ ընկան նրանք, կիմանանք արդեն մուլտֆիլմերը դիտելով: Դե ուրեմն, պատրաստվիր, սկսվում են մուլտդիտումները…

Անահիտ Ալեքսանյան

Մեկնաբանություններ

ԻՆՉՊԵՍ ԼՈՒՅՍ ԱՇԽԱՐՀ ԵԿԱՆ ԹՈՄՆ ՈՒ ՋԵՐՐԻՆ

log in

reset password

Back to
log in