Կաթնամթերքը ամենաարժեքավոր ու օգտակար սննդամթերքներից մեկն է ինչպես մեծահասակների, այնպես էլ փոքրիկների համար: Կաթնամթերքը սկսում է ուղեկցել փոքրիկին նրա կյանքի առաջին իսկ ամիսներից և որոշ ժամանակ անց նաև փոխարինում է մայրական կաթին:
Կաթնամթերքները պարունակում են չափազանց օգտակար սպիտակուցներ ու ճարպեր, ինչպես նաև կալցիում, որոնք երեխան շատ ավելի հեշտ է ընդունում կաթնամթերքի, քան մսի և մյուս սննդամթերքների միջոցով: Այնպես որ, երբ Ձեր փոքրիկը լինի արդեն կես տարեկան, ճիշտ ժամանակն է մայրական կաթին զուգահեռ կերակրել նրան նաև այս համեղ ու սննդարար մթերքներով:
Սկսում ենք կաթնաշոռից
Փոքրիկ երեխայի առաջին ծանոթությունը կաթնամթերքի հետ պետք է տեղի ունենա կաթնաշոռի միջոցով: Իսկ եթե փոքրիկը քաշի հետ խնդիրներ ունի, ապա կաթնաշոռով կարող եք կերակրել նրան դեռ 4-5 ամսականից: Դա պետք է լինի հատուկ մանկական կաթնաշոռ: Այսպիսի կաթնաշոռ կարելի է պատրաստել նաև տնային պայմաններում: Ոչ մի դեպքում մի տվեք փոքրիկին նախորդ օրվանից մնացած կաթնաշոռը: Առաջին անգամ երեխային կաթնաշոռով «հյուրասիրեք» ¼ թեյի գդալի չափով: Եթե զգում եք, որ կաթնաշոռը դուր եկավ նրան, մյուս անգամ չափաբաժինը հասցրեք կես գդալի: Քիչ-քիչ ավելացնելով այն՝ կարող եք հասցնել մինչև 4 թեյի գդալի: Բայց օրական 40 գրամը պետք չէ անցնել, եթե փոքրիկի մեկ տարին դեռ չի լրացել:
Կեֆիրի հերթն է
Եթե շուտով լրանալու է փոքրիկի մեկ տարին, ապա կարող եք նրա սննդակարգում մանկական կաթնամթերքներից ավելացնել նաև կեֆիրը և յոգուրտը: Նրանք պետք է լինեն միմիայն բնական և առանց համային հավելումների: Կեֆիրին կարող եք ավելացնել միայն մի փոքր շաքարաջուր: Երբ փոքրիկն ընտելանա այս կաթնամթերքին, օրվա ընթացքում մեկ անգամ կարող է սնվել դրանցով կրծքով կերակրվելու փոխարեն: 200- 400 մլ.-ը միանգամայն բավարար է փոքրիկի համար:
Կովի կաթի համար դեռ վաղ է
Կովի կամ այծի կաթը շատ դժվար կյուրացվեն փոքրիկի օրգանիզմի կողմից՝ բարձր յուղայնության պատճառով, այնպես որ մեկ տարեկանից շուտ խորհուրդ է տրվում փոքրիկին մայրական կաթից բացի այլ կաթով չկերակրել:
Իսկ պանի՞րը
Պանիրը նույնպես շատ օգտակար կաթնամթերք է՝ հարուստ սպիտակուցներով ու կալցիումով: Բայց շատ մանկաբույժներ խորհուրդ չեն տալիս պանրով կերակրել երեխային 1,5-2 տարեկանից ավելի վաղ: Իսկ հալեցրած պանիրներն առհասարակ հակացուցված են փոքրիկ երեխաներին: Բայց եթե որոշել եք պանիրն էլ «գործի դնել», ապա էլի պետք է սկսել ոչ ավելի, քան 5 գրամից:
Մանկական կաթնամթերքի դերը չափազանց մեծ է փոքրիկի առողջության հարցում, բայց մյուս սննդամթերքների մասին էլ չի կարելի մոռանալ: Կաթնամթերքի չարաշահումը նույնպես խնդիրներ կարող է առաջացնել: Այնպես որ, սիրելի մայրիկներ, ամենից կարևորը օգտակար և բազմազան սնունդն է: Այդ դեպքում մի քանի տարի անց ոչ Ձեր բալիկի առողջությունից, ոչ էլ ախորժակից հաստատ չեք դժգոհի…
Անահիտ Ալեքսանյան