Ամանորյա համեղ կերակուրների պակաս հաստատ չի զգացվում, բայց ախր ի՞նչ անենք, երբ մեր երևակայությունը չափ ու սահման չունի… Այս անգամ մեր երևակայությունն առաջարկում է պատրաստել տորթ – ձնեմարդ: Հո՞ չենք նեղացնի նրան… Չէ, չէ, ոչ մի դեպքում: Ուրեմն սկսե՞նք…
Մեզ անհրաժեշտ են՝
400 գր թթվասեր
200 գր կարագ
6 ձու
400 գր շաքարավազ
600 գր ալյուր
2 թեյի գդալ սոդա
Վանիլին
Սերուցք և կանաչ, շագանակագույն ու կարմիր գունավորիչներ
Ինչպե՞ս պատրաստել
Նախ կմիացնենք ջեռոցը 180˚-ով: Կարագն ու շաքարավազը պետք է լավ հարենք, հետո հերթականությամբ ավելացնենք թթվասերը, ձուն, սոդան, ալյուրն ու վանիլինը: Ստացված խմորը դնենք ջեռոցի մեջ ու եփենք 40-45 րոպե: Պատրաստ լինելուց հետո այն պետք է կտրենք՝ երեք չափի շրջանակներ ստանալով: Իսկ շրջանակներից կստանանք ձնեմարդ:
Հիմա սերուցքը կբաժանենք չորս մասի՝ մեկի մեջ կավելանենք շագանակագույն գունավորիչը, մյուսի մեջ՝ կարմիրը, իսկ վերջինի մեջ՝ կանաչը: Սովորական սպիտակ սերուցքով կպատենք ամբողջ ձնեմարդուկին: Կարմիր սերուցքով կնկարենք նրա ականջակալները, ձեռնոցն ու շարֆի մի հատվածը: Կանաչով՝ շարֆիկն ու կոճակները: Դե իսկ շագանակագույն սերուցքով՝ աչքերը, հոնքերը, ականջակալի վերևի հատվածն ու լա՜յն ժպիտը, հենց այնպիսին ինչպիսին քոնն է…
Ա՛յ այսպես գոհ կլինեն բոլորը՝ և՛ երևակայությունը, և՛ մենք և նույնիսկ ձնեմարդուկը…
Անի Ավագյան