ԼԵԳԵՆԴԱՐ ՉԱՐԼԻ ՉԱՊԼԻՆԸ


«Խոսքերը միայն խանգարում են իրար լավ հասկանալուն»:

Փոքրիկ Իշխան

1889 թվականի ապրիլի 16-ին Լոնդոնյան մի բնակարանում լույս աշխարհ եկավ սովորական մի փոքրիկ: Նրան կոչեցին Չարլզ Սպենսեր Չապլին: Փոքրիկի ծնողները՝ Լիլի Հարլին և Չարլզ Չապլինը դերասաններ էին և ծանոթացել էին միևնույն ներկայացման մեջ խաղալիս: Դերասան ծնողների պես փոքրիկ Չարլին էլ բեմ բարձրացավ, երբ ընդամենը 5 տարեկան էր: Ծնողներին, սակայն, նա շատ վաղ կորցրեց: Հայրը, որ հրաշալի երգում էր, կորցրեց ձայնն ու վշտից սկսեց խմել: Նա մահացավ, երբ Չարլին փոքրիկ երեխա էր:  Միայնակ մնացած մայրը, չդիմանալով ծանր բեռին, խելագարվեց երկու տարի անց: Չարլին քաղցած ու միայնակ մանկություն ունեցավ, սակայն դժվարությունները նրան ավելի ուժեղ դարձրին:

Շուտով Չարլին լավ պարողի համբավ ձեռք բերեց թատրոնում և փոքրիկ աշխատանք ստացավ: Նա սկսեց նաև ջութակ նվագել և օրական մինչև 16 ժամ պարապում էր: Շուտով հաջողությունը Չարլիին էլ ժպտաց և այդուհետ սկսեց ուղեկցել նրան: Սակայն Չարլին չէր դադարում աշխատել իր վրա: Եվ շուտով նրա տաղանդը նկատեցին հանարահայտ ռեժիսորներ: Նա ստեղծեց «թափառաշրջիկ Չարլիի» կերպարը, որը մինչև այսօր կինոյի ամենահայտնի կերպարներից մեկն է: «Թափառաշրջիկ Չարլին» նկարահանվեց շուրջ մեկ տասնյակ ֆիլմերում, իսկ հետո Չապլինը նաև ռեժիսոր դարձավ: Նա հանդես էր գալիս և որպես ֆիլմի ռեժիսոր, և որպես դերասան: Չարլի Չապլինը լավագույն կատակերգակ դերասանը և համր ֆիլմերի արքան դարձավ ամբողջ աշխարհում:

Չապլինի համբավն այնքան մեծ էր, որ անգամ կազմակերպվում էին Չարլի Չապլինի նմանակման մրցույթներ: Մի անգամ Չապլինն ինքը մասնակցեց այդպիսի մրցույթի: Սակայն ժյուրին նրան անգամ եզրափակիչ չանցկացրեց:

Չապլինը հրաժարվեց նկարահանել հնչյունային ֆիլմեր, և հնչյունային ֆիլմերի թողարկումից միայն 10 տարի անց հանդես եկավ նաև հնչյունային ֆիլմում: Չարլի Չապլինը աշխարհի մեծագույն ռեժիսորներից մեկն էր: Կատակերգական ժանրի ֆիլմերում մինչև այսօր էլ գործում են նրա հաստատած կանոնները: Նրա լավագույն ֆիլմերից են «Փոքրիկը», «Մեծ քաղաքի լույսերը», «Ոսկու տենդը», «Կրկես», «Նոր ժամանակներ» և այլն, իսկ ընդհանուր թվով դրանք 4 տասնյակից ավելի են: Չապլինի 3 ֆիլմ տեղ են գտել ամերիկյան բոլոր ժամանակների 100 լավագույն ֆիլմերի ցանկում («Ոսկու տենդը», « Նոր ժամանակներ», «Մեծ քաղաքի լույսերը»), իսկ «Մեծ քաղաքի լույսերը» ֆիլմը ընդգրկվել է Ամերիկյան բոլոր ժամանակների «10 լավագույն ֆիլմեր ըստ 10 ժանրերի» ցանկում՝ գլխավորելով ռոմանտիկ կատակերգությունների ցուցակը:
Չարլի Չապլինն ապրեց 88 տարի, որից 79-ը անցկացրեց բեմում ու հեռուստաէկրանին:
charlie_chaplin_44837-1024x768
Չապլինի համեստ, հմայիչ, զվարճալի արտաքինով պատանու կերպարը հարազատ էր բոլորին: Նա խորհրդանշում էր հին ու բարի ժամանակներն ու մարդկային պարզ ու մաքուր հարաբերությունները: Չապլինի կերպարն ուրախանում էր, տխրում, կատակում ու զվարճացնում առանց խոսքերի և բոլորը զարմանալի կերպով հասկանում էին նրան: Թերևս հենց լռության մեջ էր թաքնված Չապլինի հմայքը:

Annex - Chaplin, Charlie (Gold Rush, The)_04

Կինոյի պատմության մեջ հայտնի չէ մեկ այլ անուն, որ Չապլինի պես երկար համարվի լավագույնը լավագույնների մեջ: Չապլինի տաղանդն ու արտիստիզմը մնում են անգերազանցելի, իսկ նրա հմայիչ ու ամաչկոտ ժպիտը մեկ անգամ տեսնելուց հետո չի կարող մոռանալ ոչ մի կինոդիտող…

Անահիտ Ալեքսանյան


Like it? Share with your friends!

Մեկնաբանել

 

Շնորհակալություն

Հավանեք մեր էջը Facebook-ում։