ԻՆՉ Է ՍՊԱՍՎՈՒՄ ՄԵԶ ՀՈՒՆԻՍԻ 1 -ԻՆ


Եվս մեկ օր ու արդեն ամառ է, տարվա եղանակներից ամենաջերմն ու ամենապայծառը, ամենալուսավորն ու ամենաարևայինը: Իսկ ամռան հենց առաջին օրը՝ հունիսի 1 -ին, նշվում է աշխարհի ամենաբարի տոներից մեկը՝ Երեխաների պաշտպանության միջազգային օրը: Այդ օրը քաղաքը լի է լինում փոքրիկների խինդ ու ծիծաղով, գունավոր փուչիկներով, հետաքրքիր միջոցառումներով… Ես քեզ համար առանձնացրել եմ այդ միջոցառումներից մի քանիսը:

Հունիսի 1 -ի առավոտյան երբ արթնանաս, նախաճաշես, շտապիր դեպի Հաղթանակի զբոսայգի: Այնտեղ  հունիսի 1-ին 25 ատրակցիոններ մինչեւ 16 տարեկան երեխաների համար անվճար են լինելու ժամը 10:00-ից 13:00-ը: Դրան հաջորդելու են մանկական տոնական միջոցառումները, որոնք շարունակվելու են մինչեւ ժամը 19:00-ն, այնուհետ մինչ 23:00-ն համերգային ծրագիր է լինելու. զբոսայգու բեմում ելույթ են ունենալու հայկական էստրադայի հայտնի երգիչներ: Իսկ երեկոյան ժամը 22:00-ին էլ լինելու է մեծ հրավառություն:

Իսկ Երևանի կենդանաբանական այգու մուտքը հունիսի 1-ին բոլորի համար անվճար է լինելու: Երեխաների պաշտպանության միջազգային օրն այգում նախատեսված է նաև համերգային ծրագիր, տիկնիկային ներկայացումներ, հյուրասիրություն…

Հունիսի 1-ին` ժամը 11:00 «Նովոստի» միջազգային մամուլի կենտրոնում «Հույսի կամուրջ» հասարակական կազմակերպությունը հրավիրում է ասուլիսի, որի ընթացքում ելույթ են ունենալու երեխաները՝ իրենց հուզող խնդիրների մասին:

Ժամը 12:00-ին Ազատության հրապարակում՝ Արամ Խաչատրյանի արձանի մոտակայքում, տեղի կունենա ֆլեշմոբ: Հետդ վերցրու փուչիկներ և նվիրիր, ում կցանկանաս: Այնտեղ բոլորը հենց դրանով են զբաղված լինելու՝ միմյանց փուչիկներ նվիրելով:

Ժամը 14:00-ից կարող ես այցելել Սիրահարների այգի, որտեղ մի քանի լուսանկարիչ երեխաներ կներկայացնեն իրենց կողմից արված աշխատանքները, որոնք պատմում են իրենց ընկերների, դպրոցի, շրջապատող աշխարհի մասին: Ցուցահանդեսը կոչվում է «Նայեք աշխարհին մեր աչքերով»: Մանկական ցուցահանդես տեղի կունենա նաև Նկարիչների միությունում՝ ժամը 14:00-16:00:

Երեկոյան, Աբովյան փողոցի ողջ երկայնքով իրականացվելու են միջոցառումներ երեխաների համար: Լինելու են հերոսներ՝ տարբեր հեքիաթներից ու մուլտերից: Միջոցառմանը մասնակցնելու են նաև Գեղագիտական կենտրոնի նկարչական ստուդիայի սաները: Այն կազմակերպել է Աբովյան փողոցում գտնվող «Փոքր թատրոնի» գեղարվեստական ղեկավար Վահան Բադալյանը:

Երեկոյան Կասկադ համալիրում էլ կկայանա ուրախ համերգ: Երեխաները կերգեն երեխաների համար:

Սակայն նախքան հունիսի 1-ը, կա մի հետաքրքիր իրադարձություն ևս: Այսօր՝ մայիսի 31-ին, ժամը 15:00-ին՝ «Կինոյի տանը», տեղի կունենա «Հանդուրժողականությունն ըստ երեխաների» խորագրով ֆիլմաշարի անդրանիկ ցուցադրությունը:

Տեսնու՞մ ես, քեզ համար իրականացվող միջոցառումները սկսվում անգամ քո տոնից  մեկ օր առաջ: Շտապիր ներկա գտնվել այս իրադարձություններին: Մաղթում եմ քեզ ուրախ ու հաճելի ժամանց:

Տիգրանուհի Թասլակյան


Like it? Share with your friends!

Մեկնաբանել

 

Շնորհակալություն

Հավանեք մեր էջը Facebook-ում։